როგორ გავანათოთ შემოსასვლელი?

როცა ბინის განათებაზე ვფირქორბთ, ალბათ პირველი რაც თავში მოგვდის არის სამზარეულოს, საძინებლის ან მისაღების განათება. თუმცა, არანაკლებ მნიშვნელოვანია შემოსასვლის კარგად განათება, დერეფანი ხომ პირველია, რასაც სტუმარი სახლში შემოსვლილას ხედავს, ამიტომ მისი პირველი შთაბეჭდილება დადებითი უნდა იყოს. დერეფნის სივიწროვის გამო, 2 ძირითად პრობლემას ვაწყდებით: პირველ რიგში, არ უნდა დავუშვათ განათებით ამ სივრცის გადატვირთვა, რადგან ისედაც ვიწრო სივრცეს უფრო ვეღარ შევზღუდავთ. მაგალითად, ვერ დავკიდებთ მასიურ ჭაღს(მითუმეტეს, თუ ჭერის სიმაღლე არ გვაძლევს საშუალებას) ან კედლიდან ზედმეტად გამოწეულ ბრებს. მეორე მნიშვნელოვანი ფაქტორია მისი კარგად განათება. თუ შემოსასვლელში ჩრდილებია ან საკმარისად კარგად არ არის გაკაშკაშებული, ისედან შეზღუდული სივრცე შეიძლება კიდევ უფრო პატარად გამოჩნდეს. მაგრამ ნუ ინერვიულებთ, ორივე ამ პრობლემას აქვს გადაწყვეტა. მთავარია სწორი ტიპის სანათები სწორად გადავანაწილოთ ამ სივრცეში. განვიხილოთ რამდენიმე პრაქტიკული რჩევა შემოსასვლელის განათებისთვის.

ავარჩიოთ სანათები

ძირითადად, კორიდორები ისეა დაგეგმარებული, რომ იქ ერთმა ადამიანმა თავისუფლად გაიაროს, მეტის საშუალებას ის იშვიათად გვაძლევს. თუ შემოსასვლელში გაქვთ იმდენი სივრცე, რომ იქ პატარა მაგიდაც დაიდგას მაგიდის სანათთან ერთად, ეს კიდევ კარგი შემთხვევაა, მაგრამ, მოდით უფრო ვიწრო შესასვლელის მაგალითი განვიხილოთ.

წერტილოვანი განათება

ყველაზე მარტივი გადაწყვეტა, არის წერტილოვანი სანათები. ისინი არ იკავებენ სივრცეს, თითქმის შეუმჩნევლებია და ნებისმიერ ინტერიერს მარტივად მოვარგებთ. წერტილოვანი სანათები, ასევე გრძელი ფორმის, კაბელით ჩამოშვებულიც შეიძლება იყოს (ე.წ. ბარის სანათები). ამ ტიპის განათებას გამოვიყენებდით იმ შემთხვევაში, თუ ჭერი მაღალია. დაბალი ჭერი თუ გვაქვს, მაშინ ისინი სივრცეს გადატვირთავენ. წერტილოვანი განათებისას, უნდა გავითვალისწინოთ, რომ განათებას ისინი ვერ შლიან. უფრო კონცენტრირებული ნათება აქვთ და დაშორება მათ შორის მაქსიმუმ 2.5 მეტრი უნდა იყოს, რათა ჩრდილები არ დატოვოს.

ბრები

არ არის აუცილებელი ჭერიდან მოდიოდეს განათება. თუ კედლის სანათს ანიჭებთ უპირატესობას, შეგვიძლია ბრები გამოვიყენოთ. მათ შეიძლება დამატებითი შტრიხი შეიტანონ ინტერიერში, რადგან წერტილოვნებივით შეუმჩნეველნი არ არიან. გაითვალისწინეთ, რომ ამ შემთხვევაში კედლებს შორის მანძილი შედარებით დიდი უნდა იყოს, რომ სივრცე არ დაიტვირთოს. ასევე, უმჯობესია ბრები უფრო მაღლა იყოს დაკიდებული, ჭერდიან მცირედი დაშორებით და არა ადამიანის სიმაღლეზე, რათა გავლისას ხელი არ შეგვიშალოს და სივცეც უფრო დიდად გამოჩნდეს.

რელსური განათება

ამ ტიპის განათების შემთხვევაში, ჩვენ ასევე არ ვტვირთავთ სივრცეს, რადგან სანათები ფაქტობრივად ჭერს არის მიბჯენილი და დაშვება არ აქვს დიდი. მათ ასევე შეიძლება დამატებითი შტრიხი შეიტანონ ინტერიერში. რაც შეეხება განათებას, რელსური სანათები მარტივად მონტაჟდება და იხსნება, ასევე მას ერთი განათების წყარო ჭირდება შემოსასვლელის მთელს სირგძეზე. შეგიძლიათ დაამონტაჟოთ სანათები და შეხედოთ, თუ არის საკმარისი ნათება, ჩრდილები ხომ არ არის, ან ზედმეტი განათება ხომ არ არის. ამის მიხედვით შეგიძლიათ დაამატოთ ან მოაკლოთ სანათები.

ხაზოვანი განათება

ხაზოვანი განათების მთავარი უპირატესობა შემოსასვლელში არის მისი გრძელი ფორმა. მას ერთი განათების წერტილი ჭირდება და მთელს სიგრძეზე გაგინათებთ სივრცეს. ეს ფორმა ასევე დერეფანს უფრო გრძელს წარმოაჩენს. ამ შემთხვევაში, თუ ჭერის სიმაღლე გაძლევთ საშუალებას, შეგიძლიათ ალუმინის პროფილის ხაზოვანი სანათი დაკიდოთ კიდევაც. ის დიზაინის ნაწილიც შეიძლება იყოს და კარგადაც გაანათებს სივრცეს. გაითვალისწინეთ, რომ ძალიან კაშკაშა ნათება არ დაჭირდება დერეფანს და შედარებით დაბალ ვატიანი ხაზოვანი სანათი შეგიძლიათ გამოიყენოთ.

სულ ეს არის, დანარჩენი თქვენზეა დამოკიდებული, თუ როგორი ტიპის განათებას ანიჭებთ უპირატესობას. ამ რჩევებს კი თუ გაითვალისწინებთ, ნებისმიერი მათგანი შეგიძლიათ მოარგოთ თქვენს საცხოვრებელს.