როგორ გავანათოთ საძინებელი?

ყველა სხვა ოთახისგან განსხვავებით, საძინებელი არის ერთადერთი ოთახი, სადაც გვჭირდება სრული სიბნელე (როცა ვიძნებთ), ბუნებრივი, კაშკაშა სინათლე დილას და ასევე დაბალი, თბილი განათება საღამოს საათებში მოსასვენებლად. ბევრი დანიშნულებით ვიყენებთ ამ ოთახს და ბევრი განსხვავებული ფუნქციის შეთავსება უწევს მას. განათების შერჩევა საკმაოდ მნიშვნელოვანი ნაწილია, რათა ყველა ამ სიტუაციისთვის შესაფერისი ატმოსფერო შევქმნათ, ამის მიღწევა ჩვენ სხვადასხვა ტიპის განათების კომბინაციით შეგვიძლია. ამ ბლოგში თავი მოვუყარეთ რამდენიმე რჩევას, თუ როგორ გავანათოთ საძინებელი.

ძირითადი განათება

ყველაზე მნიშვნელოვანი ნაწილი საძინებლისთვის ძირითადი განათების შერჩევაა. ასეთი ტიპის ნათებისთვის რეკომენდირებულია ბუნებრივი შუქის გამოყენება დღის მანძილზე. ამიტომ არის ოთახის კედლის შემინვა ან დიდი ფანჯრების გაკეთება (რათა დღის შუქმა გაანათოს სივრცე), საკმაოდ ეფექტური გადაწყვეტილება. ბუნებრივი შუქი უნდა გვაღვიძებდეს დილით და გვეხმარებოდეს უფრო აქტიური საქმიანობისას დღის განმავლობაში. რაც შეეხება სანათებს, ამ შემთხვევაში ყურადღება უნდა მივაქციოთ, არა მხოლოდ განათების სიმძლავრეს, არამედ ფერსაც. გავითვალისწინოთ, რომ თუ საძინებელს სამუშაო სივრცედ არ ვიყენებთ და მხოლოდ მოსასვენებელი ოთახის დანიშნულება აქვს, აქ არ არის საჭირო იმდენად მძლავრი განათება, როგორც მაგალითად სამუშაო ოთახში ან სააბაზანოში. რაც უფრო კაშკაშაა ნათება, მით უფრო რთული იქნება ოთახში სიმყურდროვის შექმნა და კომფორტულად მოსვენება. თუ დღის განმავლობაში ბუნებრივი შუქი გვინათებს ოთახს, სანათები ჩვენ დაგვჭირდება ძირითადად საღამოს. თუ ჩვენ არ გვაქვს საშუალება საკმარისი დღის შუქი გვქონდეს ოთახში, ამ შემთხვევაში შეიძლება განათების 2 ნაწილად გაყოფა. მაგალითად, შეიძლება წერტილოვანი განათებისა და ჭაღის კომბინაციის გაკეთება. უფრო კაშკაშა ნათების შემთხვევაში ორივე განათება გამოვიყენოთ, ხოლო როცა დასვენება გვჭირდება ერთ-ერთი ჩავაქროთ. ასეთივე შედეგისთვის, ძალიან კარგი საშუალებაა ე.წ. დიმერის გამოყენება. დიმერი საშუალებას გვაძლევს მოვუმატოთ ან დავუკლოთ განათების სიმძლავრეს.

   როცა საქმე ფერზე მიდგება, აქ ცალსახად არჩევანი თბილ განათებაზე უნდა გავაკეთოთ. ოთახებში განათების ფერზე ცალკე სტატია გვაქვს მიძღვნილი, სადაც უფრო დეტალურად ვსაუბრობთ ამ თემაზე. მოკლედ რომ ვთქვათ, თბილი განათება სიმშვიდეს გვგვრის და თვალების განტვირთვისთვის საუკეთესო არჩევანია.
  ეს არის განათების ფუნდამენტი, ამის შემდეგ ყველა დამატებითი განათების წერტილი უნდა ავსებდეს ოთახს.


  ეს არის განათების ფუნდამენტი, ამის შემდეგ ყველა დამატებითი განათების წერტილი უნდა ავსებდეს ოთახს.

სამუშაო განათება

  თუ საძინებელ ოთახში ისეთ აქტივობებს გეგმავთ, რისთვისაც კონცენტრირებული მუშაობაა საჭირო, მაგალითად კითხვა ან მაკიაჟის გაკეთება, ძირითად განათებასთან ერთად, დამატებით სამუშაო განათება უნდა გაითვალიწინოთ. სამუშაო განათება არ შემოიფარგლება მხოლოდ მაგიდის სანათით. ამ შემთხვევაში, შეგვიძლია გამოვიყენოთ სარკის სანათი (მაკიაჟის შემთხვევაში), ლოგინის გვერდებზე წერტილოვანი, დაბალ სიმაღლეზე ჩამოშვებული ჭაღები, ან ტუმბოებზე განთავსებული მაგიდის სანათები. სამუშაო განათება შეგვიძლია ნებისმიერი ფორმით გამოვიყენოთ, მთავარია ის ასრულებდეს თავის ფუნქციას და დაგვეხმაროს კონცენტრირებული სამუშაოს შესრულებაში.

აქცენტური განათება

  აქცენტური განათების დანიშნულება შეიძლება იყოს  ოთახის ნაწილის მაგალითად კედელზე სურათის, დეკორის, ავეჯის განათება. ასევე ის შეიძლება საძინებელში დამატებით თბილი ნათების წყარო იყოს, დეკორს ავსებდეს და სიმყუდროვის განცდას კიდევ უფრო აძლიერებდეს. ის  როგორც დეკორატიული ჭაღის სახით, ასევე ტორშერის ან ბრის სახით შეიძლება შეგვხვდეს. შეგვიძლია არაპირდაპირი განათების გამოყენება, სანათებით, რომლებიც კედელს ანათებენ და ანარეკლი ანათებს უკვე ოთახს. მიზანი ამ შემთხვევაში არ არის ოთახის რაც შეიძლება კაშკაშად განათება, არამედ რაც შეიძლება საინტერესოდ განათება. როცა საძინებელში შედიხარ, აქცენტი საწოლის გარდა შეიძლება სხვა კუთხეებზეც გაკეთდეს. ამით ოთახი უფრო დიდიც ჩანს და ასევე დაბალანსებული და საინტერესო ხდება.


იმედია ეს რჩევები შეგიქმნით წარმოდგენას იმაზე, თუ რა უნდა გავითვალისწინოთ საძინებლის განათებისას და დაგეხმარებათ შეადგინოთ განათების საუკეთესო კომბინაცია. სანათების შესარჩევად და დამატებით ნებისმიერი კითხვის შემთხვევაში კი ყოველთვის შეგიძლიათ ჩვენი იმედი გქონდეთ.