რატომ გვჭირდება ინტერიერის დიზაინერი?


თუ ფიქრობ ისარგებლო თუ არა დიზაინერის სერვისით, რამდენიმე მნიშვნელოვანი საკითხი უნდა გაითვალისწინო. ინტერიერის დიზაინერის დაქირავება ზოგმა შეიძლება ზედმეტ ფუფუნებად ჩათვალოს, მაგრამ ამ ბლოგში შევეცდებით რამდენიმე მიზეზი გითხრათ თუ რატომ შეიძლება დაგჭირდეთ მისი დახმარება.



სივრცეს შენზე მორგებულს გახდის 


პროფესიონალი დიზაინერი საკუთარი გემოვნებით, ან უბრალოდ ინტერნეტიდან დაკოპირებულ ლამაზი ინტერიერის დიზაინს არ შემოგთავაზებთ. მას პირველ რიგში კითხვები ექნება რათა უკეთ გაგიცნოთ, გაიგოს როგორი დღის რეჟიმი გაქვთ, სახლში მუშაობთ თუ არა, ოთახის რომელ ნაწილს რა აქტივობისთვის იყენებთ და ა.შ. როცა განათებაზე მიდგება საქმე, ამას შეიძლება გადამწყვეტი მნიშვნელობა ქონდეს, პირობითად, თუ დასასვენებლად იყენებთ სივრცეს იქ უფრო მეტი აქცენტი დღის ბუნებრივ შუქზე გაკეთდეს, ხოლო სივრცეებში, რომელსაც ვერ გამოიყენებთ, დეკორატიული განათებით შეავსოს. ის თქვენი ცხოვრების სტილს ეცნობა და სივრცეს თქვენს ინტერესებს მაქსიმალურად არგებს.



კრეატიულ გადაწყვეტილებებს იღებს

 

თუ თქვენი ბინა ძალიან პატარაა და ის სივრცის ეფექტურად გამოყენებას საჭიროებს, ან დიდი სივრცე რჩება თავისუფალი და მისი შევსებაა საჭირო, მაშინ თქვენ გამოცდილი დიზაინერის დახმარება ნამდვილად არ გაწყენდათ. კრეატიული გადაწყვეტილებები აუცილებელია, როცა მაგალითად ტანსაცმლის კარადის ჩამატება გვინდა ბავშვის საძინებელში სადაც ამისთვის დამატებით ადგილს ვერ ვნახულობთ. ან საკუჭნაოს გაკეთება გვინდა მისთვის საჭირო სივრცის გამოყოფა გვიჭირს. შეიძლება ოთახის გარკვეული მონაკვეთების განათება იყოს პრობლემა და განათების კრეატიული გადაწყვეტილებები დაგვჭირდეს. გამოცდილი დიზაინერებისთვის მსგავსი გამოწვევები შეიძლება მარტივი დასაძლევი იყოს, მაშინ, როცა ბინის მფლობელისთვის, ზოგ შემთხვევაში, შეუძლებელი.


ის გიზოგავთ ფულს 


ეს შეიძლება ერთი შეხედვით უცნაურად ჟღერდეს, თუმცა დიზაინერის დახმარებით თქვენ შეარჩევთ საჭირო ავეჯს, განათებას, ფერს, მასალებს პირველივე ცდაზე! რაც შეცდომებისგან გაზღვევთ და დამატებით ხარჯებს თავიდან გარიდებთ. თუ თქვენ აკეთებთ ოცნების სახლს, არ უნდა დაიტოვოთ შანსი, რომ რაიმე გადაწყვეტილება ინანოთ, რადგან ამ გადაწყვეტილებასთან ცხოვრება მოგიწევთ (პირდაპირი მნიშვნელობით). დიზაინერის გამოცდილება კი მაქსიმალურად აგვარიდებს ასეთ შედეგს. დაგეგმარებიდან დაწყებული, რენდერის შედგენით, საჭირო მასალების ავეჯის, განათების შერჩევით დამთავებული, დიზაინერი ყველაფერს დაგეგმილად აკეთებს და შემთხვევითობას ასეთ პროექტში ადგილი არ აქვს. 


ის გიზოგავთ დროს 


დიზაინერს კარგად აქვს შესწავლილი ყველა დეტალი, რაც პროექტის რეალიზაციისათვის დაგჭირდებათ. მან ზუსტად იცის სამუშაოს თანმიმდევრობა და მასალების, ავეჯის განათების შესყიდვის წერტილები, სადაც სწრაფად შეძლებთ სასურველი შენაძენის გაკეთებას. სხვა შემთხვევაში თქვენით ყველა ამ ინფორმაციის მოძიება საკმაოდ შრომატევადი და დროში გაწელილი პროცესია, რემონტის დროს კი როგორც წესი, მისი მალე დასრულება ერთ-ერთი მთავარი პრიორიტეტია.
თუ ყველა ამ ფაქტორს შევაჯამებთ, აშკარა ხდება, რომ დიზაინერის დახმარებას პროექტის დაგეგმვისა თუ რემონტის დროს ძალიან ბევრი სარგებლის მოტანა შეუძლია და ზოგ შემთხვევაში შეიძლება აუცილებელიც იყოს. ბევრ სხვა სფეროში იქნება ეს ტექნიკის შეკეთება თუ თმის შეჭრა, ჩვენ საქმეს პროფესიონალებს ვანდობთ, თუმცა როცა დიზაინსა და რემონტზე მიდგება საქმე, რატომღაც ბევრს გონია, რომ დახმარების გარეშე გაართმევს თავს ამ რთულ პროცესს. ამიტომ, სანამ პროექტის დაგეგმვას დაიწყებთ დაფიქრდით, იქნებ ჯობდეს პროცესში ამ საქმის ექსპერტს დაიხმაროთ.