როცა კაფე/რესტორნის დიზაინზე ვსაუბრობთ, გასათვალისწინებელია არა მხოლოდ ვიზუალური მხარე, არამედ რამდენად კომფორტული იქნება სივრცე „სტუმრისთვის“. 


კომერციული ფართების განათება საკმაოდ დელიკატური საკითხია. პირობითად, სპორტული ფეხსაცმლის მაღაზიის განათება, სადაც სართულებად არის დახლები, რომლებზეც პროდუქტი აწყვია, პრინციპულად განსხვავდება სამკაულების მაღაზიის განათებისგან, რომელშიც მთელი ყურადღება კოკნრეტულ (ძვირადღირებულ) მოდელებზე არის გადატანილი. ხოლო, როცა საქმე კაფე/რესტორნის განათებას ეხება, „კოფი-შოპების“ ყველაზე დიდი ქსელის „სტარბაქსის“ მაღაზიის დიზაინერების - მინ ჩოს და ჯილ ენომოტოს რჩევები აუცილებლად გასათვალისწინებელია.




  მაქსიმალურად გამოიყენეთ ბუნებრივი განათება


  ბუნებრივი განათების (დღის შუქის) უპირატესობა ცალსახაა არა მხოლოდ ვიზუალური ეფექტის თვალსაზრისით, არამედ განათების ხარჯების შემცირებისთვის და სტუმრების ზოგადი ჯანმრთელობისთვისაც. მითუმეტეს, როცა „სტარბაქსს“ მომხმარებლები ძირითადად დილით სტუმრობენ. ამიტომ, სივრცეებში მაქსიმალურად არის გამოყენებული დიდი ფანჯრები, როგორც კედელზე, ისე ჭერზეც და სარკეები, რათა, რაც შეიძლება მეტი ბუნებრივი შუქი შემოვიდეს კაფეში.




 კაფის სივრცეები განსხვავებულად გაანათეთ


  „სტარბაქსის“ დიზაინერები სხვადასხვა სივრცეში, განსხვავებული ტიპის ნათებას იყენებენ, რათა მომხმარებლებისთვის გასაგები იყოს რა ნაწილი რა დანიშნულებისაა. სივრცე განათებულია იმის მიხედვით თუ საით უნდათ სტუმრების ყურადღების მიპყრობა(მაგალითად რომელიმე ახალ პროდუქტზე), სად არის გასასვლელი,  რა ნაწილში უნდა დაისვენონ, რა ნაწილში უნდა იმუშაონ და ა.შ. შესაბამისად არის გამოყენებული ბუნებრივი, ზოგადი/კონცენტრირებული, ცივი /თბილი, მაღალი და დაბალი სიმძლავრის განათება.

 კაფეში ბარის ნაწილი ყველაზე კაშკაშა და ნათელია, რათა მომხმარებლის ყურადღება მიიპყროს, მაგრამ, ამ დროს, დასაჯდომი სივრცე ბუნებრივი ან თბილი ნათებით შუქდება, რათა სიმყუდროვის განცდა იყოს შენარჩუნებული. მენიუებზე, პროდუქციასა და დეკორატიულ ნაწილზე(მაგალითად კედელზე სურათებზე) გამოყენებულია კონცენტრირებული ნათება, რელსური ან წერტილოვანი ნათების სახით.




დააბნელეთ სივრცე დაღამებისას

   სასურველია დღის და ღამის სინათლის იმიტაცია დარბაზში. დღის შუქზე უკვე ვისაუბრეთ. რაც შეეხება ღამეს, „სტარბაქსის“ ის წერტილები, რომლებიც საღამოსაც ემსახურებიან სტუმრებს, იყენებენ ე.წ. დიმერებს. მოწყობილობას, რომელიც შუქის სიმძლავრეს სურვილისამებრ აკლებს ან უმატებს სანათებს. საღამოს საათებში სივრცეს შედარებით აბნელებენ, რათა მომხმარებელს სიმყურდროვის განცდა გაუჩნდეს და დამღლელი დღის შემდეგ დაისვენოს.

გამოიყენეთ „ლედ“ განათება

 „ლედ“ განათებასა და მის უპირატესობებზე საკმარისად ვისაუბრეთ ჩვენ ბლოგზე.სტარბაქსმა“ დიდი ხანია შეცვალა ინკანდანსეტური და ჰალოგენური ნათება „ლედ“ განათებით, რითაც წლიურად მილიონობით დოლარს ზოგავს.